نماز کے مسائل

مسئلہ :         مریض کی زبان سے بے اختیار آہ ،اوہ نکلی نماز فاسد نہ ہوئی، یوہیں  چھینک کھانسی جماہی ڈکار میں جتنے حروف مجبوراً نکلتے ہیں  ، معاف ہیں  ۔

]الدرالمختار کتاب الصلاۃ  جلددوم، صفحہ ، ۴۵۶[

مسئلہ :       جنت و دوزخ کی یاد میں  اگر یہ الفاظ کہے، تو نماز فاسد نہ ہوئی۔ 

]الدرالمختار کتاب الصلاۃ،جلددوم، صفحہ ، ۴۵۶[

مسئلہ :         کھنکارنے میں  جب دو حرف ظاہر ہوں  ، جیسے اح مفسد نما زہے، جب کہ نہ عذر ہو نہ کوئی صحیح غرض، اگر عذر سے ہو، مثلاً طبیعت کا تقاضا ہو یا کسی صحیح غرض کے لیے، مثلاً آواز صاف کرنے کے لیے یا امام سے غلطی ہوگئی ہے اس لیے کھنکارتا ہے کہ درست کرلے یا اس لیے کھنکارتا ہے کہ دوسرے شخص کو اس کا نماز میں  ہونا معلوم ہو، تو ان صورتوں  میں  نما ز فاسد نہیں  ہوتی۔                                            ]الدرالمختار ،جلددوم، صفحہ ، ۴۵۵[

مسئلہ :       ہاتھ یا گھٹنے سجدہ میں  ناپاک جگہ پر رکھے، نماز فاسد ہوگئی۔

]الدرا لمحتار ، جلددوم، صفحہ ، ۴۶۶[

  مسئلہ  :    سینہ کوقبلہ سے پھیرنا مفسد نما زہے، جب کہ کوئی عذر نہ ہو یعنی جب کہ اتنا پھیرے کہ سینہ خاص جہت کعبہ سے پینتالیس (۴۵)درجے ہٹ جائے اور اگر عذر سے ہو تو مفسد نہیں  ، مثلاً حدث کا گمان ہوا اور مونھ پھیرا ہی تھا کہ گمان کی غلطی ظاہر ہوئی تو مسجد سے اگر خارج نہ ہوا ہو، نما زفاسد نہ ہوگی۔

]الدرالمختار کتاب الصلاۃ، جلددوم، صفحہ ، ۴۶۸[

مسئلہ :          ایک رکن میں  تین بار کھجانے سے نماز جاتی رہتی ہے، یعنی یوں  کہ کھجا کر ہاتھ ہٹا لیا، پھر کھجایا، پھر ہاتھ ہٹالیا ،وعلیٰ ہذا اور اگر ایک بار ہاتھ رکھ کر چند مرتبہ حرکت دی تو ایک ہی مرتبہ کھجانا کہا جائے گا۔           (الفتاویٰ الہندیہ، کتاب الصلاۃ  جلداوّل، صفحہ ،۱۰۳ (

مسئلہ :         تکبیرات انتقال میں  اللہ یا  اکبر کے الف کو دراز کیا آللہ یاآکبرکہا یا بے کے بعد الف بڑھایا اکبار ،کہا نماز فاسد ہو جائے گی ،اور تحریمہ میں  ایسا ہوا تو نماز شروع ہی نہ ہوئی۔

]الدرالمختار کتاب الصلاۃ، جلددوم، صفحہ ، ۴۷۳[

نماز کے مکروہات تحریمی

جن کا کرنا گناہ اور نماز کا لوٹانا واجب کرتا ہے:

{۱}    کپڑے یا داڑھی یا بدن کے ساتھ کھیلنا۔

{۲}    کپڑا سمیٹنا۔

{۳}    کپڑا لٹکانا۔

{۴}    آستیں  کا آدھی کلائی سے زیادہ چڑھی ہونا۔

{۵}    دامن سمیٹے ہوئے نماز پڑھنا۔

{۶}    جوڑا باندھے ہوئے نماز ادا کرنا۔

{۷}    الٹا کپڑا پہننا یا انگر کھے کے بند اور اچکن وغیرہ کے بٹن نہ لگانا جب کہ نیچے کرتہ وغیرہ نہ ہو اور سینہ کھلا رہے۔

{۸}    پگڑی اس طرح باندھنا کہ پیچ سر پر نہ ہو ۔

{۹}    بلا ضرورت کنکریاں  ہٹانا۔

{۱۰}  انگلیاں  چٹکانا۔

{۱۱}  کمر پر ہاتھ رکھنا۔

{۱۲}  مرد کا سجدہ میں  کلائیوں  کو بچھانا۔

{۱۳}  نمازمیں  بالقصد جماہی لینا۔اور خود آئے تو حرج نہیں  ، مگر روکنا مستحب ہے اور اگر روکے سے نہ رُکے تو ہونٹ کو دانتوں سے دبائے اور اس پر بھی نہ رُکے تو داہنا یا بایاں  ہاتھ  مونھ پر رکھ دے یا آستین سے مونھ چھپالے، قیام میں  دہنے ہاتھ سے ڈھانکے اور دوسرے موقع پر بائیں  سے۔                                  ]مراقی الفلاح شرح نور الایضاح کتاب الصلاۃ ، صفحہ ۸۰[

{۱۴}  اِدھر اُدھر منہ پھیر کر دیکھنا۔

{۱۵}  آسمان کی طرف نگاہ اٹھانا۔

{۱۶}  الٹا قرآن مجید پڑھنا۔

{۱۷}  شدت سے پاخانہ یا پیشاب معلوم ہوتے وقت یا ریاح کے غلبہ کے وقت نماز پڑھنا۔

{۱۸}    جس کپڑے پر جاندار کی تصویر ہو اسے پہن کر نماز پڑھنا یا تصویر کا سجدہ کی جگہ یا نمازی کے آگے یا دائیں  یا بائیں  یا چھت میں  سر کے اوپر ہونا ۔

{۱۹}    کسی شخص کے منہ کے سامنے نماز پڑھنا۔

{۲۰}    قبر کا سامنے ہونا۔

{۲۱}    کفار کے عبادت خانوں  میں  نماز پڑھنا۔

{۲۲}    غصب کی ہوئی زمین پر نماز ادا کرنا۔

{۲۳}    کسی واجب کو چھوڑ دینا۔

مسئلہ:        رکوع و سجود میں  پیٹھ سیدھی نہ کرنا، یوہیں  قومہ اور جلسہ میں  سیدھے ہونے سے پہلے سجدہ کو چلا جانا،قیام کے علاوہ اور کسی موقع پر قرآن مجید پڑھنا، یارکوع میں  قرأ ت ختم کرنا،امام سے پہلے مقتدی کا رکوع و سجود وغیرہ میں  جانا یا اس سے پہلے سر اٹھانا۔

 یوہیں  دوسرے شخص کو مصلِّی کی طرف مونھ کرنا بھی ناجائز و گناہ ہے، یعنی اگر مصلّی کی جانب سے ہو تو کراہت مصلّی پر ہے، ورنہ اس پر۔     ]ردالمحتار، کتاب الصلاۃ، جلددوم، صفحہ ، ۴۹۵ ؍۴۹۷[

   یونہیں  ناک اور مونھ کو چُھپانا،اور بے ضرورت کھنکار نکالنا، یہ سب مکروہ تحریمی ہیں  ۔

    ]ر د المحتار ، ، جلددوم، صفحہ ، ۵۱۱[

مسئلہ  :       صرف پاجامہ یا تہبند پہن کر نماز پڑھی اور کُر تا یا چادر موجود ہے، تو نماز مکروہ تحریمی ہے اور جو دوسرا کپڑا نہیں  ، تو معافی ہے۔    ] الفتاویٰ الہندیہ ، کتاب الصلاۃ ، جلد۱، صفحہ ۱۰۶[

 مسئلہ :  انگڑائی لینا،اور بالقصد کھانسنا، یا،کھنکارنا مکروہ ہے اور اگر طبیعت دفع کر رہی ہے تو حرج نہیں  ،اور نماز میں  تھوکنا بھی مکروہ ہے۔

] الفتاویٰ الہندیہ ، کتاب الصلاۃ  ، جلد۱، صفحہ ، ۱۰۷[

نماز کے مکروہات تنزیہی

جن کا کرنا شرعاً ناپسندیدہ اور ثواب کم کرتا ہے :

{۱}    کام کاج کے کپڑوں  سے نماز پڑھنا جب کہ اور کپڑے بھی ہوں ۔

{۲}    سستی سے ننگے سر نماز پڑھنا (نماز میں  ٹوپی گر جائے تو اٹھا لینا افضل ہے جب کہ عمل کثیر کی حاجت نہ پڑے ۔

{۳}    ہاتھ یا سر کے اشارے سے سلام کا جواب دینا۔

{۴}    دائیں  یا بائیں  گھومنا۔

{۵}    نماز میں  آنکھیں  بند رکھنا ۔

{۶}      ثناء ،تعوذ ، تسمیہ ، آمین زور سے کہنا۔

{۷}      نماز کے اذکار کو ان کی جگہ سے ہٹا کر پڑھنا۔

{۸}      رکوع یا سجدہ میں  بلا ضرورت تین تسبیح سے کم کہنا۔

{۹}      رکوع میں  سر کو پیٹھ سے اونچا یا نیچا کرنا۔

{۱۰}    سجدہ میں  جاتے ہوئے گھٹنے سے پہلے ہاتھ رکھنا۔

{۱۱}          سجدہ سے اٹھتے وقت ہاتھ سے پہلے گھٹنے اٹھانا۔

{۱۲}    سجدہ میں  ران کو پیٹ سے چپکا دینا مگر عورت چپکا دے۔

{۱۳}    رکوع میں  گھٹنوں  پر اور سجدوں  میں  زمین پر ہاتھ نہ رکھنا ۔

{۱۴}    بغیر عذر چہار زانوں  بیٹھنا۔

{۱۵}    منہ میں  کوئی چیز لیے ہوئے نماز پڑھنا ۔

(جب کہ قرأت سے مانع نہ ہو ۔ ورنہ نماز فاسد ہوگی۔

{۱۶}           بغیر عذر دیوار وغیرہ پر ٹیک لگانا

{۱۷}          نماز کے لیے دوڑنا ۔

{۱۸}          نماز کے واسطے مسجد میں  کوئی جگہ اپنے لیے خاص کرلینا ۔

{۱۹}          امام کو در میں  کھڑا ہونا ۔

{۲۰}    مسجد کی چھت پر نماز پڑھنا (کیوں  کہ اس میں  ترک تعظیم ہے)

مسئلہ :       صف میں (تنہا نماز پڑھنا)منفرد کو کھڑا ہونا مکروہ ہے، کہ قیام و قعود وغیرہ افعال لوگوں کے مخالف ادا کرے گا۔ 

            یونہی مقتدی کو صف کے پیچھے تنہا کھڑا ہونا مکروہ ہے، جب کہ صف میں جگہ موجود ہو ، اور اگر صف میں  جگہ نہ ہو تو حرج نہیں  اور اگر کسی کو صف میں  سے کھینچ لے اور اس کے ساتھ کھڑا ہو تو یہ بہتر ہے، مگر یہ خیال رہے کہ جس کو کھینچے وہ اس مسئلہ سے واقف ہو کہ کہیں  اس کے کھینچنے سے اپنی نماز نہ توڑ دے۔

] الفتاویٰ الہندیہ ،کتاب الصلاۃ ، جلد ۱،صفحہ ۱۰۷ [

 مسئلہ:       اور چاہیے یہ کہ یہ کسی کو اشارہ کرے اور اسے یہ چاہیے کہ پیچھے نہ ہٹے، اس پر سے کراہت دفع ہوگئی۔                            ]فتح القدیر،باب الامامتہ ،جلد ۱، صفحہ ۳۰۹[

مسئلہ :       بغیر عذر دیوار یا عصا پر ٹیک لگانا مکروہ ہے اور عذر سے ہو تو حرج نہیں  ، بلکہ فرض و واجب وسنت فجر کے قیام میں  اس پر ٹیک لگا کر کھڑا ہونا فرض ہے جب کہ بغیر اس کے قیام نہ ہوسکے۔                                     ]غنیہ المتملی کراہیتہ الصلاۃ، ۳۵۳[

مسئلہ :       د اہنے بائیں جھومنا مکروہ ہے اور تراوُحْ یعنی کبھی ایک پاؤں  پر زور دیا کبھی دوسرے پر یہ سُنّت ہے۔                       ] الحلیہ کتاب الصلاۃ ، جلد ۱،صفحہ ۳۲۸ [

مسئلہ :   نماز میں  آنکھ بند رکھنا مکروہ ہے، مگر جب کھلی رہنے میں  خشوع نہ ہوتا ہو تو بند کرنے میں  حرج نہیں  ، بلکہ بہتر ہے۔            ] ردالمحتار،کتاب الصلاۃ  جلد ۲، صفحہ ۴۹۹[

 مسئلہ :      جوں  یا مچھر جب ایذا پہنچاتے ہوں  تو پکڑ کر مار ڈالنے میں  حرج نہیں  ۔

 ]غنیہ المتملی کراہیتہ الصلاۃ، ۳۵۳[ یعنی جب کہ عمل کثیر کی حاجت نہ ہو۔

مسئلہ :       جلتی آگ نمازی کے آگے ہونا باعث کراہت ہے، شمع یا چراغ میں کراہت نہیں  ۔                              ]الفتاویٰ الہندیہ ،کتاب الصلاۃ   جلد ۱،صفحہ۱۰۹ [

مسئلہ :       قالین اور بچھونوں پر نماز پڑھنے میں  حرج نہیں  ، جب کہ اتنے نرم اور موٹے نہ ہوں کہ سجدہ میں  پیشانی نہ ٹھہرے، ورنہ نما زنہ ہو گی۔        ]غنیہ المتملی کراہیتہ الصلاۃ    ،۳۶۰[

مسئلہ :  ایسی چیز کے سامنے جو دل کو مشغول رکھے نماز مکروہ ہے، مثلاً زینت اور لہو و لعب وغیرہ۔تنبیہ  :  سانپ بچھو کو مارنے کے لیے جب کہ ایذا کا صحیح اندیشہ ہو نماز توڑ دینے کی اجازت ہے ۔ اور اگر کوئی ڈوب رہا ہو یا جل رہا ہو یا اندھا کنویں  میں  گرا چاہتا ہو اور یہ بچانے پر قادر ہو تو نماز کا توڑ دینا واجب ہے ۔ ]عامہ کتب فقہ [